Преглед
Главна тема:
ПРИРОДНИ НЕПОГОДИ И КОНСТРУКЦИИ
17. Меѓународен симпозиум на Друштвото на градежни конструктори на Македонија (ДГКМ 2017) ќе се одржи од 4 до 7 октомври 2017 година во Охрид, Република Македонија. Симпозиумот ќе биде фокусиран на прашања поврзани со градежното конструкторство, со акцент на однесувањето на конструкциите под влијание на вонредни дејства и природни непогоди, како што се: земјотреси, екстремно високи и ниски температури, пожари, ветер, експлозии, поплави, свлечишта, лавини и др. Главната цел на симпозиумот е да обезбеди форум каде домашните и странските учесници ќе можат да разменат знаења и идеи за најновите научни достигнувања и практики, поставувајќи насоки за идни истражувања и соработка во областа на градежништвото. Поканети се да учествуваат сите градежни конструктори и студенти, како и истражувачи од сродните области.
Главни теми
- Сеизмичко проектирање на конструкции
- Отпорност на конструкциите на пожар и експлозии
- Климатски влијанија врз конструкциите, како екстремно високи и ниски температури и ветер
- Влијание на поплави, лавини и свлечишта врз конструкциите
- Превенција од непогоди и намалување на последиците врз конструкциите
Други теми
- Теориска и експериментална анализа на конструкции
- Современи методи за проектирање на конструкции
- Еврокодови и национални анекси
- Современи методи за градење
- Современи материјали и технологии за одржлив развој
- Сигурност, робусност и трајност на конструкциите
- Мониторинг, одржување, зајакнување и санација на конструкции
- Инфраструктурни објекти
- Други теми поврзани со градежното конструкторство
Во соработка со Комората на овластени архитекти и овластени инженери на Република Македонија, во рамките на Симпозиумот ќе биде организирана тркалезна маса на тема „Законот за градење и потребите од измени и дополнувања“. Втората тркалезна маса на тема „Имплементација на Регулативата за градежни производи – CPR 305/2011“ ќе биде организирана во соработка со CEN – Европскиот комитет за стандардизација.